صوت الناس

مدارس عناتا: قلق يومي واعتقالات من داخل الحصص




خليها ليوم السبت!! السبت من كل أسبوع هو يوم الراحة النفسية لأهالي قرية "عناتا" شرقي مدينة القدس الآباء والأمهات ينجزون أعمالهم براحة تامة دون أن يكون ذهنهم شاردا على بوابة المدرسة، أو مترقبا لوقت انتهاء اليوم الدراسي. في الواحدة ظهرا على مدى الأيام الباقية يحتشد الأهالي وسط البلدة ينتظرون خروج أبناءهم وبناتهم من المدرسة، يمسكون بأيديهم ويسيرون معا باتجاه البيت، هذا المشهد يصور الحياة اليومية على مدار الاسبوع، لكن الامور بدات تتغير على بوابة المدرسة منذ بداية السنة الدراسية الحالية، الانتظار اليومي قد يمتد الى ساعات او لبعض الايام.

شو صار بالمدرسة يا أبو بهاء..؟
والله إحنا الأمور بدت معنا من بداية العام الدراسي 2005 بلشوا يحفروا بساحة المدرسة عشان الجدار، من 1/9 لليوم كل يوم اشتباكات بين الطلاب والجيش والعمال إلي بشتغلوا بالجدار، مداهمات للمدرسة ضرب للأساتذة والطلاب اعتقالات، تهديدات بتسكير المدرسة أو نقلها، تغير في معالم المدرسة، مثلا إحنا بنعطل ظهر الخميس ليوم السبت الصبح، باجي السبت بلاقي ساحات المدرسة مسكرة. بعدين بخلو الطلاب في الاستراحة اليومية على 10:30 بصيروا يتجولوا بساحة المدرسة ويستفزوا فيهم، الطالب بصير يرمي حجار وبتقوم ميمعة غاز وضرب ومشكلة إلها اول ما إلها آخر، بتهدى المشكلة بيجي موعد الترويحة الميمعة بتقوم مرة ثانية شو بدي احكيلك

مين يضبط الوضع..?
حراس الجدار فاتحين موسيقى على أعلى ما يكون، مرات بالسماعات بصيروا يسبوا على الطلاب ويحكوا حكي يستفزهم، بهادا الجو ما في تدريس مخ الطالب والاستاذ بظلوا مشوشين. شو بدك لما جندي يهجم على المدرسة ويعتقل طالب أو مدرس من الصف ومن الحصة!! والسبب دايما براجموا علينا حجار. الجندي يبقى مصّورلو طالب من خمس أيام ضارب حجر، اليوم بيجي على بالو يعتقلوا باخدو من نص الحصة. والله معارك بتصير، جابولنا الكلاب، جابولنا قوات على الخيول على باب المدرسة، رشاشات المي...... مضلش إلا طيارات الهيلوكبتر. وين امن الطالب؟ وين استقرار الطفل؟ وهو الجندي قاعدلو على شباك الصف والا على باب الحمام. في المدرسة 50 % من طلاب المدرسة إذا مش اكثر اعتقلوا واختطفوا لساعات شو بدك اكتر من هيك؟.

سكّروا الحمام...
المراحيض للطلاب حطوا عليها جدار وسكروها وحولوا مدخلها من جهة ثانية الولد الصغير والكبير بكون في الحمام ما بشوف إلا الجندي قدامو يعني الأولاد الصغار إلي في المدرسة الواحد مستعد يبول على حالو ولا يوصل الحمام اكتر من مرة يكون في الحمام ويرتعب لما يشوف الجيش.

وين الولد يا أستاذ أبو بهاء..؟
طبعا أنا شخصيا بتحمل المسؤولية كاملة أولياء الأمور بيجوني، والجيش مش مخليني بحالي ثلاث مرات اخدوني على المخابرات قال أنا المسؤول، لازم اضبط الطلاب والا بسكروا المدرسة، الأهالي لما ولادهم يعتقلوا، اول ما بيجيو إلا عندي، التربية كمان محملتني المسؤولية، بتعرفيش من وين متلقيتيها اضبط الطلاب في المدرسة والا اضبط الجيش!! بعدين الطالب لما يطلع من بوابة المدرسة وين بدي الحقوا اضبطوا(يوسف عليان،مدير مدرسة عناتا للبنين).

اعترفت علينا..؟
تخيلي واحد عمرو 11 والا 15 أو حتى 17 يروح على المخابرات، والا انخطف من الجيش لمدة ساعات ويتحقق معو، انسي النفسية، شو الولد إلي بدو يتعلم يعترف ويحكي مع الجيش والا يسجل أسماء شو بدو يكون مستقبلو. طبعا الجيش بمسك واحد من الأولاد بصير يمزح معو وياخد منو ورق والا أبصر شو الولاد بصيروا يشكو في بعض ويتعاملوا مع بعض انت عميل وأنت مش عارف شو، هدول صغار الواحد فيهم من الخوف بصير يكذب. هادا الحكي بصير، وسبب مشاكل كتيرة بين الطلاب نفسهم.(يوسف عليان، مدير مدرسة عناتا الثانوية للبنين)

اعترف بطلعك اليوم...
أجا كلبشني ولف ايدي لورى وكلبش اجري وصار يضرب، وحكالي اعترف انك ضربت حجار ومين كان معك، محكيتش، أجا مسكني من شعري إلي من عند داني وصار يخلع فيه، حكيتلوا خلص بعترف، صرت احكي أسماء مش موجودة وهوي يطلع على الورقة ملقاش ولا اسم، حكالي عندي سبع أسماء اعترف عليهم وبديش أحبسك عدلي أسماءهم حكيتلو بعرفهمش. في التحقيق ورجوني صور وأنا اطبش عليهم حجار، وحكولي عليك اعترافات انك مطبش حجار في شهود علي أسامي صحابي إلي اعترفوا علي....
(سفيان شبلة شوامرة، 16 سنة)

امي بتوصلني على المدرسة..
بعد المحكمة دفعت غرامة ألف شيكل، وأعطوني حكم إقامة في البيت. لازم أمي توصلني على المدرسة كل يوم الصبح وتسلمني للمدير، وعند الترويحة لازم استناها لحد ما تيجي تاخدني من المدرسة، وخلال النهار ممنوع اطلع من البيت، وعندي محكمة في 31/5، شو!!! حاسس حالي زي الأولاد الصغار أمي تجيبني وأمي بتوديني، أمي بدّرس في مدرسة البنات إلي جنبنا، بخليها توصلني من الصبح قبل ما الأولاد يجو على المدرسة شو مسخرة بنحرج كتير طبعا. خلال فترة السجن ضاعت علي مواد كتير، ملحقتش الولاد هسة شوي بدي اخد دروس خصوصي وأشوف الأساتذة يعني بدي أدبر حالي.
(امين خليل عجالين،18 سنة)

شو خص مدرسة البنات!!1...
إحنا احتكاك مباشر مع الجيش ما عنا، مداهمات اعتقال طالبات ما في، بس مشكلتنا اليومية هيه قنابل الغاز إلي بتيجي كل يوم على المدرسة، لما بصير اشتباكات مع مدرسة الأولاد. هيها جنبنا في كمان مدرسة بنات لفوق شوي... ثلاث مدارس جنب بعض، المهم يعني البنات عنا لا براجموا حجار ولا بهتفوا، بس كل يوم قنابل الغاز بتملي ساحة المدرسة، بنكون في الطابور الصباحي ما منشوف إلا الغاز بين الطالبات، صار عنا حالات اختناق وإغماء مش طبيعية، صرنا نسعف البنات في ساحة المدرسة.

بدنا إسعاف...
عنا معلمات حوامل بقدروش أصلا يتحملوا الغاز، حوالي 800 طالبة وإحنا 63 معلمة يعني كيف بدنا نقدر نسعف هادا العدد، حالة هلع وترويع للبنات...، بصيروا يتدافعوا هون وهون، في طالبات عندهم أزمة والغاز من النوع الكثيف المؤذي، أنا شخصيا معي دورة إسعاف لما أكون مخنوقة من الغاز مش رايحة اقدر أسعف صح، يوم يوم هدا الحكي بصير.

بنتي فاطمة...
بنتي فاطمة في الصف الخامس مستحيل تطلع من باب المدرسة وتروّح بدون ما أكون ماسكة ايدها، الجيش هيهم على البوابة بتشوفهم، وبكون ماسكة ايدها بتصير تصرخ امسكيني امسكيني ...، بعرفش شو بصير بمخها بتنسى أني أنا مساكة ايدها، بتوقف بتقدرش تمشي، كل يوم بتحكيلي انو ركبها بوجعوها، يعني أنا بكون اطلّع عليها، وضعها مصيبة بترتعب من الجيش، وبتكون مش صاحية انو ايدي بايدها.(سوسن ابو صلب،مديرة مدرسة عناتا الثانوبة للبنات(

فاطمة
لبسهم بخوفني كتير والشنتات الي معهم كلها سلاح، لابسين طواقي بصيروا يطلعو علي، وانا في الشارع بخاف يوخدوني، بخاف اروّح لحالي لازم مع امي، بستناها لما تروح وتسكر المدرسة بروح معها، مرات اذا مفش طخ بروح مع صاحباتي بس مش على دارنا، على دار ستي مهوي دار ستي مش بنفس الطريق الي واقفين الجيش فيها، انا حكيت لامي خلينا نغير البيت ونعيش مع ستي دارها بعيدة عن طريق الجيش، لما أشوفهم بصيروا اجري يوجعوني، بحس حالي مش قادرة امشي، بدي اهرب مش قاردة اهرب منهم بصير بدي اعيط، مرة كنت مروحة انا وامي اجت سيارة الجيش بسرعة كتير، فكرت بدهم يوخدونا صرت اعيط ومسكت امي، كبو زبالة وراحوا. انا شفتهم بضربوا الولاد الي من المدرسة، وصاحبتي حكتلي انهم مسكو ولد وضلوا يضربوا على ايدو بالحجر.